منتديات شــباب المســتقبل

منتديات شباب المستقبل.... كل ما تتمناه ، اسلاميات ، ثقافة ، ألعاب ، رياضة ، ترفيه ........
 
الرئيسيةالبوابةمكتبة الصورس .و .جبحـثالتسجيلالأعضاءالمجموعاتدخول

شاطر | 
 

 أنا ما بحبش مصر ماذا عنك أنت ؟!!!!!!!!!!!

اذهب الى الأسفل 
كاتب الموضوعرسالة
Abedalellah
عضو فعال
عضو فعال
avatar

انثى
عدد الرسائل : 101
العمر : 33
الدولة : أم الدنيا
الوظيفة : مشروع طبيبة
المؤهل : ثانوية عامة
تاريخ التسجيل : 04/01/2007

مُساهمةموضوع: أنا ما بحبش مصر ماذا عنك أنت ؟!!!!!!!!!!!   الخميس يناير 18, 2007 11:49 pm



بسم الله الرحمن الرحيم
مش عارف ابدأ منين الموضوع دا لانه موضوع صعب اوى
والاصعب منه انك تقول كل اللى جواك والاكثر صعوبة
ان فى حد يتقبل كلامك خصوصا وانتا بتتكلم عن الوطن
اها نبدا من هنا الوطن يعنى ايه كلمة وطن دى مش اغنية محمد فؤاد
لا دا سؤال محتاج اجابة
الوطن اعتقد انها كلمة يختلف فى تعريفها اغلب الناس
فى ناس الوطن بالنسبالهم ذكرى جميلة زى ما بيقولوا الغربة
والحنين وفى ناس الوطن بالنسبالهم يعنى الرموز والقادة
زى عبد الناصر والثورة وفى ناس الوطن بالنسبالهم يعنى المصلحة الشخصية
اللى عايز يحميها ودول الحرامية وفى ناس الوطن بالنسبالهم مجموعة من الحدود
يعنى حتة ارض وسماء وشوية ناس ليهم صفات متشابهة زى اللغة والثقافة
والدين والاكل وغيره
ندخل للسؤال التانى امتى ظهر الوطن ؟
اكيد اغلبنا يعرف المعلومة دى ان ظهور الوطن بدأ مع ظهور
الزراعة وتحديد الملكية الفردية عشان يقدر يحمى ارضه ويدافع عنها
وبعدين اضطر لتجميل الوضع دا فعمل علم ونشيد وطنى وغيره
من الحاجات المفتكسة اللى احنا بنشوفها دلوقتى
خلاص هانت قربنا ندخل الجزء المهم فى الوطن ونعرف كلمة الوطنية ؟!!!
واللى على اساسها بنقسم الناس لوطنيين واكثر وطنية وعملاء وخونة واولاد
كلب كمان
وعلى اساسها عملنا جيوش من الاغانى الوطنية زى اغنية متقولش
ايه ادتنا مصر وقول هندى ايه لمصر (( عايز اقول كلمة اعتراضية قبيحة بس مكسوف )) واغنية مصر دى امى
طيب لما مصر تبقى امى مين يبقى ابويا ؟؟ الشعب ههههه كلام اهبل وعبيط
لا لا اكتر من كدا دا احتيال على المشاعر بجد والله
غير ان فكرة تسول الوطنية دى فى حد ذاتها فكرة زبالة
يعنى ايه انك تحمى وطنك (( كجندى مثلا )) ووطنك مش يحميك (( كمعتقل مثلا )) يعنى
لو اخدنا مثال زميلك المعتقل ازاى بعد كام سنه هيحمى اللى اعتقلوه مش دا ظلم
لا يا وطن انتا كدا انانى وانانى اوى كمان
يعنى ايه انك تمنح الوطن والوطن مش يمنحك
طبعا لو حد سمعنى بقول الكلام دا هيقول عليا انى عميل وخاين
وازاى يقول كدا على الوطن المقدس
مع ان والله العظيم والدى من الناس اللى حاربوا فى 73 وخدم فى القوات المسلحة اكتر من 35 سنه
نرجع تانى للموضوع الاساسى ونقول الوطن ؟ ايوه الوطن المانح
ماذا منحنى الوطن ؟ انا فكرت كتير فى السؤال دا بصيت حوليا
لقيت الكهرباء والميه والتليفون والتعليم والتموين كلها خدمات مدفوعة
والتعليم اللى زهقونا فى عيشيتنا انه مجانى وان مجانية التعليم لا غنى عنها
اكتشفت انى انصرف عليا فى التعليم وكلكوا كمان آلاف آلاف
الجنيهات حتى الدعم ورفع المرتبات وكلمة الطبقة الفقيرة العاملة
كله عبث فى عبث يطلع الريس فى الخطبة اللى عمرى ما سمعتها
ملحوظة فى الهامش الريس هو الوحيد فى العالم اللى بيتكلم بالفصحى مع شعبه
وكل خطبة لازم يحلف ستين طلاق ان ما يهمه فى الدرجة الاولى هو مصلحة المواطن
الغلبان محدود الدخل يا راجل هو فى حد فى العالم مرتبه اقل من 40 دولار فى الشهر
غير فى مصر دا الامريكى اللى دخله اقل من 2000 دولار دا عندهم يبقى معدم
ومش لاقى ياكل
بعد الموضوع الطويل العريض دا عايز اقول انك صعب اوى تدى وطنك امان
انتا مش حاسس بيه - لانى مؤمن بجملة فاقد الشىء لا يعطيه واللى زود الاحساس دا عندى
هو شعورى بالغربة فوق تراب وتحت سماء الوطن
دى كانت حاجات جوايا وفى الاخر موصلتش لقرار
بجد بتقطع من جوايا من شدة حبى للوطن بقيت بكره الوطن لانى عايز اشوف كل حاجة فيه كويسة
نفسى كل واحد ياخد حقه فى البلد دى نفسى كل واحد يقول كلمة حق ولو لمرة واحده
نفسى تجاوبوا على الاسئلة اللى كتبتها فوق دلوقتى وتجاوبولى على سؤالى الوطن ادانا ايه واوعدكوا
انى اديه الضعف 10 مرات
انا دلوقتى حاسس ان وطنى هو اى مكان اشعر فيه بالامان حتى ولو كان قلب حبيبتى
اللى انا معرفهاش
لانه ببساطة اى مكان بيحبك هيخاف عليك ويديك امان
ملحوظة الموضوع كتبته فى حوالى ساعتين
وانا فى أسوأ حالاتى المزاجية على الاطلاق وعذرا لو كان فى اخطاء املائية
او فقرات غير مترابطة
من المفارقات الغريبة وانا بكتب الموضوع دا كنت بسمع اغنية كل ليلة بسهر
بطولة فريق ام تى ام
وسمعت الجملة دى
---------------
اكيد الواحد مينفعش يعيش لوحده مها كان
بردو الانسان لازم يدور على المكان
اللى شايفه فى الاحلام
اللى عايزه من زمان
اللى يلاقى فيه الامان والسلام
---------------
عرفت ان ممكن يكون عندى حق فى الكلام اللى كتبته عن الامان
والسلام عليكم ورحمة الله وبركاته


_________________

يا قارىء خطى لا تبكى على موتى فاليوم أنا معك و غداً فى التراب فإن عشت فإنى معك و إن مت فللذكرى و يا ماراً على قبرى لا تعجب من أمرى بالأمس كنت معك وغداً انت
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.ayamnaa.lolbb.com
 
أنا ما بحبش مصر ماذا عنك أنت ؟!!!!!!!!!!!
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات شــباب المســتقبل :: القسم العام :: منتدى النقاشات الحرة-
انتقل الى: